اليوم العشرين من تحدي ال29 يوم
اليوم العشرين من التحدّي!
بهالتحدي اني داقرا كتاب the laws of human nature بديت اقراه
باللغة العربية وبعدين اكتشفت ان الترجمة مو كاملة، وهالشي خلاني اقرر انو اتحدّى
نفسي اكمله باللغة الانكليزية ويكون اول كتاب اقراه بالانكليزي، والهدف انو خلال
هالتحدّي يوميّة اقرا 10 صفحات من هالكتاب!
اليوم تقريبا وصلت صفحة 500 من الكتاب، هو جان مفروض انو اوصل صفحة 550، بس
خلال هالعشر ايام طلع اسمي بمنحة للسعودية وهالشي خلاني شوي اتشتت، رغم هذا
الأيّام الي مقريت بيها انكلش، بقيت مركز ع انكلش وعلى مراجعة الكلمات الي تعلمتها
سابقا لان مقابلة المنحة جانت بالانكلش وحسيت بسعادة لما استخدمت الكلمات الانكليزية
الي تعلمتها من خلال قراءتي.
المصادر الي داستخدمها نفسها متغيّرت، واحس انو تقدمي حلو بالكتاب، لان
متهمني السرعة، بس اني سعيد شخصيا لان دافهم واستوعب هالكتاب بسهولة مو مثل
البداية كلش أتاخر وما افهم وصعوبات...
بهالفترة من التحدي احس بالارهاق شوي، احس هواي امور لازم اسويها، بس بنفس
الوقت بعد هالتحدي راح اكمل كتاب بالانكليزي! وهالشي كلش اشوفه انجاز جبير، لان
القرائة بالانكليزية كلش مهارة اريد احصلها وبالتالي احسن من نوعية المعلومات الي
تدخل دماغي، ف اي احس انو صار مسؤولية مش مجرد تحدّي.
بالنهاية ما انوي اغير من خطة التحدي، انما راح احاول ازيد كمية الصفحات
الي اقراها حتة اكمل الكتاب كله، ولو ماتصور يكمل كله، بس على الاقل راح احاول!
دايما لما نتحدّى نفسنا ميكون الهدف مهم كلش بقدر ما مجرد الاقتراب منه هو الأهم.
بالايام العشرة الجاية راح اكون مخلّص تقريبا فوك ال85% من الكتاب، وميبقة
شي واكمله وانشر للناس عنه واشجعهم يقروه.
اني ممتن جدّا لفرص الحياة المختلفة الي تخلينا نكدر نشوف مهاراتنا
ونختبرها، ونخرج من رؤيتنا المثالية لانفسنا، ممتن كثير لنفسي لأني اكدر افهمها
وما احطمها بالوساوس والافكار واطورها دايما، واخيرا اني ممتن للصدفة الي خلتني
بهذا الزمن بهذا المكان، حتى تخليني اشوف شنو اقصى شي ممكن اسويه وحكدر اصنع تغيير
لو لا؟ who knows!
هاي الصورة يظهر بيها الملفات الي جمعتها من بداية التحدي وكل ملف تقريبا 60 كلمة
تعليقات
إرسال تعليق