البداية وية تحدي ال29 يوم

 

مرحبا بيكم

اني لوسيفر طالب صيدلة من العراق، وقررت أشارك بتحدّي ال29 يوم وحشارك هالشي وياكم من خلال هالمدوّنة!

قررت أتحدّى نفسي بخصوص كتاب ببداية الموضوع كنت اقراه باللغة العربيّة وبعدين اكتشفت انو الكتاب غير مُترجم بشكل كامل، ومن هالنقطة قررت أنو انزّل نسخته الانكليزيّة واكمله بالانكليزي.

 

باللغة العربية تقريبا قريت من هالكتاب 200ص، وبقى منه 490 صفحة بالانكليزي، حقراها خلال هالفترة، بنفس الوقت الكتاب مو روايّة، وانما كتاب بعلم النفس للكاتب روبرت كرين، واسمه قوانين الطبيعة البشريّة.

 

اللغة الانكليزي مالتي بشكل عام زينة، بس بقراءة الكتب كلش ضعيفة، خصوصا الكتب بخصوص علم النفس والعلوم بشكل عام، واللي هي الانكليزية الاكاديميّة طبعا.

 

طبعا اداة جدا عظيمة حتساعدني وهي قاموس كيمبردج، الحلو انه لما اقرا كلمات جديدة ماعرف معناها، مو بس اكدر اطلع معناها، انما اكدر اضيفها للستة، وبعدين هو يجمعلي كل الكلمات واني فقط اطبعها، وبشكل يومي راح اراجع الكلمات الي تعلمتها قبل لا اقرا شي جديد، وصحيح مراح اكدر احفظ كل الكلمات ولكن راح افهم عدد كبير منها.

 

بنهاية هالتحدي راح اكون كملت اول كتاب الي باللغة الانكليزية، وأيضا لكاتبي المُفضّل! وبنفس الوقت حكون طورت نفسي كلش هواية باللغة الاكاديميّة، ووصلت بيها مستوى افضل وأحسن.

 

وشكرا الكم