اليوم العاشر من تحدي ال29 يوم
اليوم العاشر من التحدي:
جان التحدي بالنسبة الية هو انه يوميا اقرأ عشر صفحات من كتاب انكليزي لأول
مرة علمود اقوّي لغتي الانكليزيّة وهمين بنفس الوقت اقرا الكتاب الي احبه!
الي هو كتاب the laws of Human Nature
الهدف جان انو اخلص أغلب الكتاب او كله، وفعلا خلال هالفترة اني وصلت صفحة
420 من اصل 690 صفحة
(سابقا قاري منه 200ص بالعربي وبعدين اكتشفت انو الترجمة مو كاملة)
خلال هالايام العشرة جنت اقرا تقريبا يومية عشر صفحات ومرات أكثر لان اندمج
بالقصة والتفاصيل والتحليل لان الكتاب بي هواية قصص وامثله، اما الادوات الي
استخدمتها فهي قاموس كامبردج فقط ومرات موقع يوكلش حتى احصل اللفظ الصحيح، ومبدئيا
كدة بالبداية جان الموضوع صعب وياخذ وقت كلش هواية بحيث مالحك اسوي اي شي ثاني
بيومي، بس باليوم السابع والثامن وبعدها صرت متعود واقرا بشكل اسرع(تقريبا ساعتين) واستوعب بشكل
أفضل لان أغلب الكلمات مرّت عليّة.
بالنسبة لأول عشر أيام فاعتقد اني بعدني متحمس وانو الموضوع صار جزء من
روتيني، حرفيا مجرد اكعد من النوم افتح اللاب واقرا... هالشي يخليني متحمس لنهاية
هالتحدي حتى اكون مكمل الكتاب الصاك هذا! بنفس الوقت اشتريت كتابين ورقيين لنفس
الكاتب وهم بالانكليزي
حتى اقراهم بعد هالتحدي.
راح استمر على نفس الخطّة ونفس العدد من الصفحات او يجوز اقرا أكثر، مش
فارقة كلش، هو الهدف انو اقرا واستوعب عدد الكلمات الجديدة يوميا، مو المهم
الكتاب، بس بنفس الوقت اتصور انو حكمل الكتاب هم بنهاية التحدي، بالعشر ايام
الجاية راح اوصل لصفحة 550 شوي دا ازيد عدد الصفحات، وبس كدة.
اني ممتن جدا اولا لهذا التحدي ولمرتضى لانه هالشي خلاني اكدر التزم واشوف شنو اني اكدر اسوي، ممتن ايضا لشروق الشمس الي يومية اكعد من الصبح حتى اشوفه(عكس مرتضى وية الغروب)، واخيرا ممتن لروبرت كرين كاتب الكتاب لانه انسان يجنن وتفكيره جدا ماكر ويعجبني تخطيطه وتحليله النفسي.
تعليقات
إرسال تعليق