نهاية تحدي ال29 يوم
تقريبا قبل شهر من هاليوم شاركت بالتحدي الي سواه مرتضى، وجانت الفكرة من التحدي هي انه كل شخص يتحدّى نفسه بشي يسويه لمدة 29 يوم.
بالنسبة الية فقبل فترة جنت اقرا كتاب بالعربي، اسمه قوانين الطبيعة
البشرية (علم نفس-روبرت كرين) وتفاجأت واني بنهاية الكتاب انو الكتاب ينتهي يمي
بالفصل الرابع، بينما بحثت بالنت انو الكتاب تقريبا 19 فصل! هنا عرفت انه الترجمة
مو مضبوطة الي عندي، او يمكن ناقصة أيّا كان.
شفت هالفرصة مناسبة انه اتحدّى نفسي اكمل قراءة الكتاب كله بالانكليزي!
واني اول مرة اقرأ كتاب باللغة الانكليزية...
قبل شهر من هاليوم جنت ببداية الكتاب، وماتصور انو ممكن اكمله، جانت الصفحة
الوحدة بالنسبة الية مُعاناة انو اكملها بخير وسلامة، دايما تطلعلي كلمات غريبة،
وبنفس الوقت لازم افهم المحتوى وسياق الكلام، جنت احتاج وقت كلش جبير حتى اقرا
شوي.
امّا اليوم فاني بنهاية الكتاب حرفيّا، واقرا بكل سهولة ومرتاح، بنفس الوقت
الكلمات صارت سهلة بالنسبة الية لان اغلبها حفظتها وتعلمتها، عن طريق استخدام
قاموس كامبردج، وحتى قاموس كامبردج كثير شافوني اتعلم عليه وسالوني عنه، فاني سويت
فيديو على اليوتيوب يشرح استخدامه:
https://www.youtube.com/watch?v=FY_FDdsa2E8
همين بالايام الاولى جنت متحمس وسويت فيديو عن فصل من الكتاب جان يسولف عن
طبيعة الحسد من ناحية نفسيّة.
حاليا افكر انه اكمل الكتاب لان وصلت آخر 100 صفحة حاليا، وطبعا خلال
التحدي جنت يومية اقرا 10 صفحات تقريبا، اكو ايام قريت اكثر، واكو ايام انصابيت
بكورونا ومكدرت اقرا اصلا، بس كمعدّل لما نقسم الصفحات الي قريتها على الايام يطلع
15 صفحة خلال كل يوم من ايام التحدي.
اعتقد انها فكرة جدا ذكية ان نوقف حياتنا العادية شوي ونشوف شنو الشي الي
دايما نتهرب منه، ونخلي هالشي محور حياتنا، بحيث نكون مضطرين انه نواجهه اخيرا،
حنكتشف طرق تخلي اسهل، وحيطلع احلى مما جنا متصوريه، كلش اشجع على ان كل شخص يقرا
هالكلام يتحدى نفسه، مو شرط ل29 يوم، حتلو لو سبع ايام، المهم الفكرة.
اتمنى التوفيق للجميع بالنهاية.
تعليقات
إرسال تعليق